التاج دا وصلنى من حبيبتى هارت أوف أوشن صاحبة مدونة اللذية مجرد رسائل ودا اللينك بتاعها
وممكن اعرفكم سريعا يعنى ايه تاج للى ميعرفوش وأقتبس المعلومات دى من أختى قبس من نور حيث عرفت التاج فقالت:
وأصل الكلمة أجنبية بالطبع كما كتبتها في عنوان التدوينة تقال في لعبة أشبه "
بالاستغماية بمعنى ( مسكتك ) .. وأنا ولله الحمد اتمسكت !
مع الوقت تم تعريب الكلمة فحملت معنى التاج على الرأس .
على فكرة هذا السر الخطير لم أعرفه بمفردي قطعاً ؛ بل قرأته في أحد المدونات ولا أذكر أين"
وممكن نعتبر دا أول تدبيسة ...أحم أحم اقصد أول تاج فى عامل التدوين يوصلنى
نبدأ على بركة الله بقى و الله المستعان
لو قالولك اختاري عصر من عصور مصرعلشان تعيشي فيه تختار اى عصر و فى عهد اى ...واشمعنى؟
ممم سؤال وجيه ...ممكن أختار أعيش فى عصر أول الفتح الأسلامى لما عمر بن العاص كان بيحكم ...كان عصر قوة و بدأية أنتشار الأسلام أهو برده كان ممكن ندعو ونعمل شوية شغل حلوين:)
وممكن فى عصر الشافعى لما جا مصر ...كان عصر علم وأزدهار ليه قوووى وأهو برده كنت أطلب علم شرعى على أيده
يا أما بقى عصر لسة مجاش وهو العصر اللى نرجع فيه لله عز وجل ونغير فيه شكل هذا الكون ليسبح بأسم الله
اول اولويه فى حياتك عيلتك ولا شغلك ولا اصحابك؟
أعتقد أنى لما كنت فى مصر وأيام الكلية كنت عاملة توازن للأمر لحد كبير بين كل الحاجات دى ...بس أكيد الأولوية للعائلة من باب وأنذر عشيرتك الأقربين....أولوية ليهم فى كل حاجة يليهم الأقرب فالأقرب ..ربنا يديم على الجميع نعمة القرب من عائلته ..فعلا زى ما أستاذ عمرو خالد بيقول هى دى الجنة ...الجنة فى بيوتنا
ايه اكتر حاجه بتحبيها فى رمضان؟
أكتر حاجة طول عمرى بحبها هى أحساس القرب من الله لما بنبقى مركزين من قبل رمضان فى كدا , لمة العيلة والضحك والكلام على الفطار اللى ممكن فى أوقات كتير نفتقدها , وأحلى لحظات العشر الأواخر لما تقود من نومك وكل ما ترتجيه عفو من الرحمن ...اللهم أنك عفو كريم تحب العفو فعفو عنا
اوصفى ليا اجمل فطار ممكن تفطريه؟
أجمل فطار فطرته فى حياتى فطارى مع أخواتى وأصحابى قى الكلية ...كل حاجة كنت بلاقيها فيه ...الحب فى الله ..رقة فى القلب ...لحظات لا توصف أبدااااا أفتقدها و الله بشدة فهى لحظات أجمل من الدنيا وما فيها نجتمع فيها على طاعة ونأنس بروح الحب فى الله
وفطارى مع أمى وهى مبسوطة وبتضحك وتقعد تزغط فيا لغاية ما أبقى خلااااص ...حفرقع:)رغم كل محاولاتى للتملص من الأكل
لو انت حاكم على مجموعه من الافراد هتكون ...هتعمل ايه عشان تتأكد انك حاكم عادل؟
طبعا حكاية حاكم دى صعبة أنها تحصل من باب أنى واحدة:) بس مش مشكلة ححاول أعيش فى الدور حبة
أول حاجة حخلى فى متابعة وتقارير بتصدر من كل الجهات عشان أعرف العمل ماشى أزاى أولا بأول ...لازم أتفقد الرعاية بنفسى كما كان عمر بن الخطاب رضى الله عنه يفعل ....حعيش عيشة الرعية زى برده ما عمر كان يفعل رضى الله عنه مش بقى هما فى عشوائيات وأنا فى قصرى العاجى لا أدرى عن أحوالهم شئ....وأولا وأخيرا ححكم بالكتاب و السنة ...وفيهم العدل كله....أنتخبونى أنتوا بس وأنا حوريكم:)
اللى بيبوظ الحكام .......نفسهم؟ ولا الشعب؟ ولا الحاشيه المقربه؟
كل واحد ليه عامل فى التلاتة
الحاكم لما بيقى معتبر الحكم تشريف ...أو أنه ورث البلاد أبا عن جد وهى ضيعته وملكه الخاص ...ولما يحكم بما لم ينزل الله به من سلطان
والشعب لما ينتشر الفساد فيه فيولى الله عليه بذنوبه من لا يرحمه ولا يتق الله فيه
والحاشية المقربة لما تكون بطانة سوء وكل ما تبغاه نعيم الدنيا الزائل و ملك يبلى ويفنى
مين أكتر اعلامي مصري بتحترميه؟
ممم سؤال صعب ...بحترم حمدى قنديل وأن أختلفت معه
أحترم منى الشاذلى وبرده بختلف معاها ....وأحترم علاء بسيونى أيضا كمقدم لبرامج دينية و كذلك محمد الذى يقدم برنامج هذا ديننا مع عمر عبد الكافى على قناة الشارقة و أن كنت لا أعرف اسمه كاملا فمعذرة
قريتي ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟
لم أقرأه للأسف ولكن سأبحث عن المدونة واحاول القرءاة ولكن بعد رمضان لو ربنا طول فى عمرى :) عشان أنا حهرب من النت شوية للعيد كدا
لو ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟
نفسى أوى أعمل مركز للعلاج بالحجامة والأعشاب بس على أساس زى ما درست فى صيدلة ...بس الموضوع لسة فى علم الغيب ومؤجل لحين رجعوى للأرض الوطن
ايه تانى بلد تتمنى تعيش فيها بعد مصر؟
معرفش بس أنا تعبانة غربة ....ممكن السعودية بس أبقى جنب حد من صحابى زى ربى الله أو آلاء صحبتى ...أو فى المدينة المنورة
اوصفي ليا ترتيبات اجمل فرح ممكن تحضرية؟
فرح أسلامى بس يكون شيك ومنظم ..الفرقة تكون كدا حلوة وظبطة الأناشيد كويس...ويكون فى كوشة ممكن بالورود ...والعروسة تكون واحدة من أخواتى ..يا رب أخلص منهم كلهم :)أقصد أفرح بيهم كلهم
بتراعي كلام الناس والقيل والقال؟ لو اه او لا قولى ليه؟
أكيد ..بس ساعات الواحد بيتحط فى مواقف بيبقى صعب يرضى كل الناس فيها ..ويتمنى لو الباقين يفهموه ويفهموا تصرفه دا
صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟
يلا خير بأذن الله ...أبقى أنقش تدويناتى على الحجر ولا جريد النخل:)
كل شئ جايز برده
السعاده بالنسبه لك هى؟
أولا فى رضا ربنا ويمكن دا سبب أكتئابى لما بحس أنى علمت حاجة ممكن تغضبه ...ثانيا فى رضا زوجى لأنه بالحديث جنتى ونارى ...ثالثا فى رضا اهلى .....ثم فى وجودى وسط أخواتى ...
عندك امل ...اسبابك؟
طبعاااااااا....دا أنا بعيش بيه ...أملى فى رحمة ربنا ...أملى أنه يستجب لكل دعائى ويصلح حالى ...وأملى فى غد أفضل وأننا نغير شكل الكون
وكلمتى الشهيرة اللى سرقاها من حد أعرفه ....ربنا كريــــــــــــــــــــــــــــــم
لما تحب تهرب من كل شئ بتروح فين؟
غالبا فى أى جامع :) اللى الاقيه فى طريقى بس دا فى مصر ....هنا بقى مفيش مكان للهروب ........زى الفار فى المصيدة
:)
امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟
ممممم......أول مرة لما رحت أعدادى صيدلة فى اسكندرية وفجأة لقيتنى لأول مرة فى حياتى لوحدى ....تانى مرة لما حسيت أنى حبقى أم حست أنى بجد حبقى مسئولة ومسئولية مينفعش أهرب منها ولا حد يشلها بدالى ...ومرة كمان فى موقف مش حقوله بس كانت وانا فى تانية كلية لما كان لازم اختار واخترت ....أخترت حاجة كلما استخرت الله عليها أشعر أنى على حق
ربنا يثبتنا على الحق
لما بتعمل عمل خيرى بيكون ايه هو دافعك الاول؟
سؤال لذيذ يعنى ...ما أى واحد حتى لو منافق حيقول لله طبعا :)..بس أكيد لله عز وجل أولا ثم بقى حسب العمل تعدد النوايا
بتعرف ايدك اليمين من الشمال ازاي؟
مش حرد ....عشان الأجابة المنطقية أنى أقول الأيد اليمن على اليمن :)
ايه اكتر اله موسيقيه بتحبها ؟
الحمد مبقليش فى الكلام دا:)
فى رأيك ليه الذوق والنخوه اتعدموا؟
مش للدرجة لسة الدنيا بخير ...بلاش نبص على الجزء الفاضى من الكباية
ايه الحاجه اللى لو حصلتلك تبقى سعيد قوى؟؟؟
ياااااه كتــــــــــــــــــــــــــــــــــــير قووى ..خلوها فى سرى وادعوا أنتوا بس أن ربنا يحقق فيما يرضيه أمالى
تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟
أختار الستــــــــــــــــــــــــــــر :) و اللى يجى يبقى خير من ربنا
البحر و لا النيل؟؟
بعشق الأتنين ...ممكن أسبوع هنا وأسبوع هناك؟
مركب ولا طياره؟
مركب فى البحر وقت الغروب ...جربتها مرة وكانت روعــــــة.......وممكن طيارة اروح اعمل عمرة بسرعة وارجع
انت مجنونه ولا عاقله؟
سؤال وجيه ...بس ممكن أكون واحدة عاقلة قوووى ساعات ..وممكن أكون من المجانين فى بعض الوقت وبعض القرارات ..أنا زى ما واحدة قالت عنى مرة ...متعرفش تحطينى فى قالب ثابت طول الوقت
تقرأ كتاب و لا تتفرج عليه فيلم؟
لا أقرا كتاب بدل ما أشوف حاجة مش كويسة فى الفيلم أحسن
بتمرر التاج لمين؟
بجد اللى حمررهواله حاسة أنى حبقى بعقبه بجد عشان أنا أيدى وجعتنى بجد :) بس معلش المسامح كريم ممكن أمرره لتواقة للجنان صاحبة مدونة طريق الجنان ...وأمرره لشروق الشمس صاحبة مدونة فقاقيع كلام ...ولربة السيف و القلم ولأختى أسماء العريان صاحبة مدونة حعيش وأتحدى أحزانى
كفاية كدا بقى أنا تعبت قــــــــــــــــــــــــــــــــــــــــــــــــــــوى
